Trust

Mach s Fanstr uf, loß Sunne rei,
wos sölln de triebn Stundn!
Du host mit dar Sinniererei
dich ötz genung geschundn.

Kumm endlich raus aus dennr Gruft,
wöllst de noch ganz vrmoudrn?
Horscht de s ne, wie de Omsl rufft,
spierscht de ne s Blutt an Oudrn?

De Knospn bredtn schunt avier
on nacktn Fliedroste.
Und du, mei Freund, wos ös mit dir?
Göb s zu: gejommrt host de,

ols täte dr ock Harzelejd
und sunstrn nöscht mieh bleibn.
Stieht denn ne s Friehjuhr schunt gerejt,
n Wöntr zun vrtreibn?

De Knospe spurte ou n Frost
und ös doch ne drfrurn.
Ock war de Hoffnung ganz vrlost,
dar ös ou ganz vrlurn.

Doch draußn stieht a jungr Tag
und s taurt nemieh lange,
dou horscht de wiedr Lerchnschlag
dort ibr n Wiesnhange,

dann sein de Blietn wiedr dou
und s Halml sprißt an Grunde,
dann lacht dr Hömml friehjuhrschblou,
dann lockt de halle Stunde,

und olles kricht drnourn glei
a frehliches Gesöchte.
Mach s Harze uf, loß Sunne nei!
Ou dir word s wiedr lichte!

Diskuze