Gablinzr Berufe

A Dröckr, a Dröckr
ös a ormr Housnflöckr.
Ban Ufn dou sötzt a,
an Summr dou schwötzt a,
noch n Zwockrn dou sprötzt a,
jojo, jojo,
noch n Kreuzrn dou springt a
und s Bier jo dos trinkt a,
nu froit ock ne wie,
obr blou ös a nie.

A Gortlr, a Gortlr
nu dos ös a röchtschr Wortlr.
A tut prassn und littn,
a tut bejgn und kittn,
mit dr Froue tut a moichmoul tüttn,
nujo, nujo,
n ganzn Tag – s kon jo doch nöscht nötzn –
de holbe Nacht muß bei dr Warscht a sötzn,
nu froit ock ne wie,
obr Gald hout a nie.

A Schleifr, a Schleifr
jo dos ös euch gor a steifr.
De Kneppl die sejmt a,
bei dr Orbeit dou trejmt a,
kejne Vasprzeit vrsejmt a,
nejnej nejnej,
schiene Orbeit und a höbsches Luhn,
nu dou kon a freilich moichmoul ruhn,
nu froit ock ne wie,
obr sch Mundwark ruht nie.

A Schlossr, a Schlossr
hilt sich ömmr ibr n Wossr.
N Karn jo dan praßt a,
und moichmoul zrraßt a,
drnouchrn dou kraßt a:
Oje oje.
Ofte kuckt a eis Feur
und de Kappl die warn teur,
nu froit ock ne wie,
obr schlajcht sein se nie.

A Liferante, a Liferante,
nu dos ös a Spekulante.
Ne zwej Schriete mieh zu Fuß morschiern,
ömmr ock an Auto römkutschiern,
ei enn Fratsche dann ös Gald kassiern,
jojo jojo.
Wenn mr n braucht, dou ös a ne zu föndn,
wal a sich römdröckt an Konture hintn,
nu froit ock ne wie,
obr Zeit hout a nie.

A Exporteer, a Exporteer,
jo wenn mr ou ock su a Mon schun wär!
Dar gieht ock ei Schlips und Krogn,
fährt n ollrschinnstn Wogn,
war n sahn tut, dar mog n,
jojo jojo.
Noch n Mustrn dou schöckt a
und de Preise die dröckt a,
nu froit ock ne wie,
obr zusetzn tut a nie.

Mei Liedl, mei Liedl
ös ötz fertsch ou ohne Fiedl.
Ich ho euch menn Quork gesungn,
und hout s ou ne höbsch geklungn,
ös ou moichs a bößl schorf gelungn,
nujo nujo,
mößt r halt a bößl schömpfn
und mößt eure Nose römpfn,
fohrt vull Eifr ei de Hieh,
obr biese sein sellt r nie!

Diskuze