S schinnste Licht

Villes hon se schunt drfundn,
Neonlicht und söche Sachn,
die uns ei dan fönstrn Stundn
jedn Winkl halle machn.

Und doch spiert mr sch ömmr sarnr:
Mit dr Zeit and mit n Juhrn
ös de Walt wull vill modarnr,
doch se ös ne hallr wurn.

Denn dos Halle, wos de abn
orscht n Glanz brengt, wie mr sprechn,
dos, wos worklich lojcht an Labn,
läßt sich ne nouch Watt berechn.

Obr kuckt ock ei dan Stundn
undrn Weihnachtslichtrbougn
amoul för a poor Sekundn
su enn Kinde ei de Ougn.

Wos fr Frejde, wie vill Glöcke,
wos fr seliches Empfindn
lojcht aus su enn Kindrblöcke!
Kon mr mejr Glanz wu findn?

Wos sich ou de Menschn plougn,
nie word Tunklei ganz vrschwindn.
Doch zwej sötte Kindrougn
könn euch s schinnste Licht ozöndn.

Diskuze