Neujuhrschwinsche

A neues kömmt, dos ale Juhr gieht fort
und Winsche wechsln wiedr wie drvur,
mr rufft sich s zu, mr schreibt sich s dou und dort:
"A glöckliches, zufriednes neues Juhr!"

Jo, war ös schunt zufriedn of dr Walt?
War tut denn kejne Winsche ei sich trohn?
Dar winscht sich vill Gesundhejt, jer vill Gald,
dr nächste tut nouch n Erfolge john,

und jedr denkt drbeine mejst o siech,
und moichr tut dos Unrajcht laut beschrein:
wiesu hout denn dr Noppr mieh wie iech,
und dou soll noch de Walt ei Ornung sein?

Nu freilich, vill ös unrajcht, dos wejß Gout,
und moiches kömmt ganz andrsch wie mr wolln,
doch war de ei siech salbr Ornung hout,
dan word dos Labn ou vill mieh gefolln.

Ne ömmr muß dos Äußre sich drfölln,
ne ömmr kon dos Gruße uns gelingn,
nej, de Zufriednhejt wächst oft an Stölln
und s Glöcke findt sich ou ei klintschn Dingn.

Und war dos wejß und war de dos drkennt,
dar ös n Glöcke of dr rajchtn Spur,
denn glöcklich ös, war sich zufriedn nennt.
Su winsch ou iech a gudes neues Juhr!

Diskuze