Ollrlej Quetschn

War de ne wössn sellte, wos quetschn ös, dar soll ocke n Daum ei s Schraubstöckl lehn und feste zudrehn. Dann wejß a s. Und wenn a Porsche zun Madl soht: "Kumm ock har und loß dich quetschn", dann word s dos Madl söchr vrstiehn. Wenn se s vrstiehn wöll!

Ane Quetsche wor obr ei friehrn Juhrn ane Dröckhötte. Und enn Dröckr hißn se Quetschr. Noch ei ennr aln Gewerbelöste vu dr Morkstarnr Harrschoft aus n Juhre achznhundrtdreiundreisch hejßt s: 14 Glasquetscher. Ols salt de Ufndröckrei ufkom und se s orschte gestochne Zeug machn totn, dou hottn se freilich noch kejne Maschinn wie heute. A poor eisrne Kappl ei ennr ejfachn Zange, dos wor olls. Und zun dröckn mußtn noch zweje sein, ennr, dar de Zange zuquetschn tote, abn dr Quetschr, und ennr, dar de mit enn Zengl de Nolde dorchschiebn tot, dos wor dr Stechr. Doß obr moiche ale Dröckhötte worklich ou ane enge Quetsche wor, dos kinn euch ale Dröckr drzähln.

Quetsche hiß obr ou dr ale Wajg, dar de vun Neudorfe aus dr schorfn Ecke of n Seidschwanz ging. Dort o dan Wajge hong o enn Boume ane Toffl, of dar mr lasn konnte, doß dr Simm"Paur aus n Kukone amoul an Wöntr Holz gerockt hotte, und ols a mit enn vuln Schlöttn s Bargl nundr gefohrn wor, hotte a ömgeschmössn und Simm hotte s zwöschn dan ufgelodtn Holze und ennr Föchte drquetscht. Seit dar Zeit sohtn de Leute zu dan Wajge "de Quetsche".

A Quetschl nu wär eigntlich ane klejne Quetsche. Mr mejnt obr drmitte a Noppeisn, dos a Gortlr zun Uflehn braucht. A Stejnmechr freilich konnte mit su enn Hamprichzeuge nöscht ofang. Dar mußte schun Eisn und a Fäustl und enn schwern Porl hon. "Ocke ömmr schiene sachte", hotte a Stejnmechr zun andrn gesoht, "an Stejnbroche hejßt s ufpossn, doß de dich ne wu quetschn tust." Und ei olledan wor n vu ubn dr Porl of de Zinn gefloun.

Und ols Antoun mit dr Touni ane schwere Kiste an Schoppn trohn tote, hott a zun r gesoht: "Ban Obsetzn gib ock oubachtsche, doß de dr ne de Fingr quetschst." Und dou hotte de Touni su gehliche giehn lossn, doß Antoun seine Pfleckl nemieh geschwönde genung drundr avier brochte. A ös hericht salt ville Wochn mit enn bloun Fingrnohle römgeloufn.

Nu macht halt de Ougn uf, doß dr euch ne wu quetschn tut! Und hout eur Klennr jenn Tag amende ou ane ganze Tube Zohnpasta ei de Hurborschte gequetscht, na dann quetscht ock a Ouge zu! Mr worn jo ou kejne Engl.

Diskuze