Ne zun drkenn

Wos su ane Foschingsnacht
moichmoul aus enn Menschn macht!
Leute, die de sunst solide,
gor ne orre, ehndr miede,
of amoul, wos mejnt r denn,
sein die nemieh zun drkenn.

Dou zun Beispiel Noppr Miillr,
sunstrn su a Mon a stöllr,
dan de doch, wos mir su denkt,
nöscht ne aus dr Rue brengt.
Obr gestrn hätt r dan
sölln om Foschingsbaale sahn!
Grodewajgs wie ömgepottrt
ös a najchtn römgeflottrt,
tote singn und springn und renn,
wor euch nemieh zun drkenn.

Ols Pirate ogezoun
kom a ibr n Sool gefloun,
schworzr Hutt und griene Jacke,
rute Loudn o dr Backe,
o dr Seite ganz vrwegn
su enn Poppndeckldegn,
gale Stiefln o senn Benn,
wor euch gor ne zun drkenn.

Schwenkn tot a jedes Stöckl,
hoppte wie a junges Zöckl
röm und nöm und tot ne kentrn.
Moiches Madl tot a entrn,
schloppte s o de Theke hie,
haute of n Tiesch und schrie:
"Noch enn Schnops! Ock ja kenn klenn!"
Jo, a wor ne zun drkenn.

Heute leit a ei dr Kommr,
hout enn ejsn Kotznjommr.
Su a trauriches Gestecke!
Weiß wie ane Wixleimtdecke,
jommrn tut a, denn an Schadl
dreht sich s wie a Roprradl,
und a klopprt mit n Zenn:
ös euch nemieh zun drkenn.

Jo, wos ane Foschingsnacht
moichmoul aus enn Menschn macht.
Gestrn noch of "hohen Rossen",
heute leit a wie drschossn,
najchtn tollrn, heute flenn.
Morne warn mr n wiedr kenn.

Diskuze