De Beichte

Dou worn amoul zwee Schulmadl, dicke Freundinnen, dan stond de örschte Kommunioun bevor. Se gingn fleißich ei de Kirche und totn sich ei dr Religionsstunde gewissnhoft uf dos gruße Ereignis vurbereitn. Dr Katechete hotte n de Zeremonie urntlich drklärt und ou druf hiegweisen, doß se ihr Gewissn drforschn solln und olle ihre Sindn beichtn missn. Drnouchern vier n dr Beichtvotr de Absolutioun erteiln. Sunntsch frieh dann dirftn se ei ihrn neun Klejdln ei de Kirche zur Kommunioun kumm, abr ganz nichtern mißtn se sein, dos hejßt, se dirftn noch ne gefriehstickt hon. Dos wor also klor.

De zahn Gebote kanntn se schun auswendich und jetze wor zu priefn, wu se gesindicht hottn. Ane jede zug sich zuicke und ganz verhouln gingn se dro, ihre schworzn, sindichn Seeln zu drforschn. S Rosl schrieb sich uf an klenn Zedl, ei ganz klenner Schrift, wos se zu beichtn hätte. Se drschrok direkt, se kom uf 23 Sindn, schwere und lässliche, se hätte ne gedocht, doß su vill zommkumm wiern. Wie se sich nouchher mit ihrer Freundin Erna wiedertrof, stacktn se sich zu, wievill Sindn jede zommgebrocht hätte, de Erna wor sugor auf 24 gekumm.

Bejde worn se gor getatscht, daß se s mit n Gebotn vun liebn Gott su wing ernst genumm hottn und se schamtn sich, doß se dos olles iebern Beichtvoter n liebn Gott offnbarn mißtn, obwull se jo onahm totn, doß dar dos jo suwiesu schun olles wejß, denn dar wor doch ollwissnde. Se komm sich jednfolls ganz elende vier.

Sömmt nochmitts trofn se sich vor dr Kirche, sotztn sich dann nei ei ane Bank und totn wortn, bis dr Beichtstuhl frei wor. De Erna ging zu örscht hie, denn die hotte jo mieh om Kerbholze. N Rosl pumperte s Harze zun Zerspringn os se drokohm. Se hulle ihrn klenn Zedl afiehr und fing o ihr Siednregister vurzulasn, dos wor gor ne su ejfach, denn s wor rajcht finster. Se hotte kaum ogefangn, tote dr Pforrer zu ihr schun wos son, abr se verstond n gor ne su rajcht, se sotzte desholb fort und redte etwos lauter, se dochte nämlich, dr Pforr hätte se ne verstandn, wall se zu leise gemurmlt hätte. Nej, dou fing dr Pforr, dos Moul etwos lauter, schun wiedr o: "Geh schon, geh schon!" Gor drschrockn ging se von Beichtstuhle weg und woßte ne, wos se machen selle. Vu dr Absolutioun hotte se nischt mitgekricht, ocke, doß se schun giehn se11e. Drbeine hotte se jo noch gor ne olle Sindn gesoht, dou worn noch a ganz poor sehr schwere drunder. Wall de Erna vorne ban Altore kniete, ging se halt ou hie, tote a Vaterunser batn, de Erna tote uf se wortn und dann gingn se zomm naus.

Wie se wieder n bloun Himml sogn, sohte s Rosl zur Erna: "Ich wejß ne, ob dos rajcht ös, dr Pforr hout mich gor ne ausredn lose, dar hout mich glei weggeschejcht. Ich denke, dar wor wull biese, wall ich gor su sindhoft gewast bie. Vu ar Obsolutioun ho ich nischt gehort, und wenn, dann gilt die jo ock fr die poor Sindn, die ich n Pforrn schun gesoht hotte, olle andern, die ich noch gor ne vurglasn hotte, die schleppe ich jo noche mit mir röm". De Erna sohte druf: "Mir ös es docke genau su gegangn. Wos sölln mr denn dou ötze machen? Könn mr unse Beichtzedl Schurr fortschmeißn, doß se jo niemand ei de Hände kricht odr missn mr fr dan Rest noch amoul beichtn giehn? De grißte Siede wäre jo, wenn mr morne ei dan Zustande zur Kommunioun giehn tätn, noch vuler Sindn."

Bejde worn se gor zerknirscht und keine wor sich en Klorn, wie dos wetten giehn selle. Je mieh Obstand se vu dr Kirche om Hejmwahge knichtn, umso fester wur ihre Mejnung, doß se jo eigntlich nischt drfier kenntn, doß se ötze noch mit Sindn behoft sein, doß dos jo ganz allejne dr Pforr zu verantwurtn hätte, jo, se wurn sich schlisslich ganz sichr, doß se morne ganz ohne Gewissnsbisse vurn liebe Gott hietratn könntn. Sicher hotte dr Pforr bei dr Beichte ock ne röchtsch Zeit, amende totn wos plougn und a hotte s eilich wuhie zu giehn. Dos wird s wull gewast sein.

Diskuze