Erzählt von Herta Peukert.
S worn amoul drei Madl, sehr gude Freundinnen, ejne drvou, de Anna mußte iebr de Ferien ei s Biehmsche. Dos wor friehr su ieblich, doß mr ei s Biehmsche mußte, denn de Kinder solltn jo Biehmsch larn.
Dan bejdn andern Madln, die de drhejme gebliebn worn, fahlte de Anna sehr, und wall se ne woßtn, wos se allejne ofangn sölltn, komm se uf de Idee: "Mr kenntn de Anna amoul besuchn." Und wie amoul a chiener Tag wor, zugn se lus, und zwor Richtung Jitschin. Se worn schun lange geloufn, dorch Torne worn se schun dorch, de Fisse totn a bößl wieh, desholb gingn se liebr borbs, und se worn ou schun rajcht miede. S wor halt doch wetter, wie se sich s vurgestallt hottn.
Dou hiern se hinder sich Pfaregetroppl, s kömmt ane Kotsche. Die zwee worn sich glei ejnich: "Dou hoppn mr hintn druf und fohrn mitte". Se lossn dos Fohrzeug vurbei und springn hintn druf. Se lachtn sich o, wall s su gutgekloppt hotte. Ötze komm se natierlich lechter und schneller vurwärts. Wie se ei s nächste Dofr nei komm, dou stondn vill Leute uf dr Strouße und winktn dr Kotsche zu, de Glockn totn läutn und de Madl winktn zuricke. Se konntn sich zwor kenn Reim druf machen, s worn abr ou ejgol. Se dochtn, amende hon de Leute ou uns zugewinkt. Ene nächsn Dorfe wor s genau widr su. Und uf ejmoul fuhr die Kotsche vu dr Strouße runder ei an Houf nei, dos merktn se obr orscht a bößl späte, drum sprongn se noch schnell runder. Ötz stallte sich obr ou raus, mit wechn Taxi se gefohrn worn: dr Bischouf wor s, dar de dan Urte seine Ufwortung machte und se unbemerkt mitgenumm hotte. Wenn se dos friehr gewoßt hättn, dou wiern se wull ne mitgefohrn sein.
Se worn trotzdem fruh, doß se su a grußes Stöcke ne hottn loufn brauchen und se s ötze nemieh gor su weit, bis zur Freundin hottn. Obr wenn so on Hejmwajg dochtn, su ganz ohne bischötliches Taxi, dou wurn schun a bößl schummrich.

Diskuze

Vstoupit do diskuze