S ös halt su!

Moichmoul tut en wos bedrickn,
Tag und Nacht gibt s kejne Ruh.
Kummr tut dich fost drstickn.
Konnst nischt machn, s ös halt su.

Ejmoul stiehst de dou, allejne,
mejnst, wörscht niemouls mieh rajcht fruh.
Gude Zukunft, sist de kejne.
Find dich ob, denn s ös halt su.

Machst de wos und s gieht drnabn,
denn s pressierte noch drzu.
Du verzweiflst fost on Labn.
Bleib ock ruhig, s ös halt su.

Ne wie friehr sein de Leute,
und du mejnst, die änderscht du?
Ärgerscht dich sehr ofte heute.
Konnst nischt machen, s ös halt su.

Braucht wos dringend, tust s vermissn,
deine Stimmung sinkt im Nu,
losse dich s ock ne verdrissn,
nömm s gelossn, s ös halt su.

Wenn ich min gedankn spiele,
mich uf etwos frehn tu,
hal ch zuricke de Gefiehle.
Ofte kloppt s ne, s ös halt su.

Hoffnung dorf mr nie verliern,
s kon jo sein, s kloppt partou.
Dorfts ou amoul s Glicke spiern.
Nu dann lach ock, s ös halt su.

Wie s ou kömmt, bie s ock zufriedn,
krumm und pucklich ös de Walt.
Wos en Labn dir bscheidn,
nömm s ock hie, su ös es halt.

Diskuze